کوالالمپور، ملائیشیا: تحریکِ منہاج القرآن کوالالمپور کے زیراہتمام شبِ برات کی مناسبت سے روحانی و فکری اجتماع منعقد ہوا، جس میں صدر منہاج القرآن انٹرنیشنل پروفیسر ڈاکٹر حسین محی الدین قادری نے توبہ، رحمتِ الٰہی اور مغفرت کے موضوع پر ایمان افروز اور فکر انگیز خطاب کیا۔
خطاب میں انہوں نے شبِ برات کی فضیلت، توبہ کی حقیقت اور روحانی تطہیر کی اہمیت پر جامع انداز میں روشنی ڈالی۔ انہوں نے بتایا کہ اللہ ربّ العزت نے مخلوق کو مراتب و درجات میں تقسیم فرمایا ہے، جن میں انبیاء کرام، صدیقین، شہداء، علماء اور صالحین شامل ہیں، تاکہ ایمان، محبتِ الٰہی اور قربِ خداوندی کے معیار کو واضح کیا جا سکے۔
انہوں نے کہا کہ جیسے انسانوں میں مراتب ہیں، اسی طرح مقامات اور اوقات میں بھی فضیلت رکھی گئی ہے۔ مساجد میں مسجدِ حرام، مسجدِ نبوی اور مسجدِ اقصیٰ کو خصوصی مقام حاصل ہے، جبکہ اوقات میں رمضان المبارک، شبِ قدر، جمعۃ المبارک اور شعبان کی پندرہویں رات (شبِ برات) کو خصوصی روحانی حیثیت حاصل ہے۔
پروفیسر ڈاکٹر حسین محی الدین قادری نے شبِ برات کو مغفرت، رحمت اور رجوع الی اللہ کی رات قرار دیتے ہوئے کہا کہ یہ اللہ تعالیٰ کی خصوصی رحمت کے نزول کی رات ہے، جس میں بندوں کے لیے توبہ کے دروازے کھول دیے جاتے ہیں۔ انہوں نے توبہ کو محض زبانی عمل نہیں بلکہ مکمل روحانی تبدیلی قرار دیا، جس میں ندامت، آئندہ گناہ نہ کرنے کا عزم اور عملی اصلاح شامل ہے۔
انہوں نے قرآن و حدیث کے حوالہ جات دیتے ہوئے بتایا کہ اللہ کی رحمت اس کے غضب پر غالب ہے اور توبہ کرنے والا بندہ نہ صرف معاف کیا جاتا ہے بلکہ محبوبِ خدا بن جاتا ہے۔ حدیثِ مبارکہ کے مطابق اللہ تعالیٰ نے رحمت کے سو حصے بنائے، جن میں سے ایک حصہ دنیا میں نازل کیا گیا اور ننانوے حصے آخرت کے لیے محفوظ رکھے گئے ہیں۔
اختتام پر انہوں نے تحریکِ منہاج القرآن کے عالمی مشن، دعوت و اصلاحِ معاشرہ کے کردار پر روشنی ڈالی اور شیخ الاسلام ڈاکٹر محمد طاہرالقادری کا خصوصی پیغام پہنچایا۔ انہوں نے شرکاء کو تلقین کی کہ وہ قرآن و سنت کی روشنی میں اپنی انفرادی و اجتماعی زندگی کو سنواریں اور منہاج القرآن کے فکری مشن سے وابستہ ہو کر دینِ اسلام کے مثبت اور اصلاحی پیغام کے فروغ میں کردار ادا کریں۔
اجتماع میں مینیجنگ ڈائریکٹر منہاج ویلفیئر فاؤنڈیشن فیصل حسین مشہدی، صدر منہاج ایشین کونسل عبدالرسول بھٹی، امام مسجد پاکستان حافظ عبدالغنی، امیر دعوہ اسلامی محمد خلیق مدنی، صدر منہاج القرآن نیو ساؤتھ ویلز آسٹریلیا میاں محمد واثق، صدر منہاج القرآن ملائشیا علی رضا، سینئر نائب صدر محمد اقبال جنجوعہ اور جنرل سیکریٹری امجد رضا سمیت بڑی تعداد میں عوام الناس نے شرکت کی۔
تبصرہ