بانی و سرپرستِ اعلیٰ تحریک منہاج القرآن شیخ الاسلام ڈاکٹر محمد طاہرالقادری کی 71ویں سالگرہ کی تقریبات دنیا بھر میں موجود تحریک منہاج القرآن کی تنظیمات جوش و خروش کے ساتھ منا رہی ہیں۔ یہ دن تحریک منہاج القرآن کے رفقاء و وابستگان کے لیے یومِ تشکر اور تجدیدِ عہدِ وفا کا دن ہے۔ قائد ڈے کے اس پرمسرت موقع پر کارکنان اپنے اپنے انداز میں شیخ الاسلام سے محبت، تعلق اور نسبت کا اظہار کرتے ہیں۔ اس سلسلے میں منہاج القرآن دبئی ٹیم نے قائد ڈے کی پروقار تقریب ایک خوبصورت مقامی پارک میں انعقاد کیا۔ حافظ مبشر نے تلاوت کلام پاک سے تقریب کا آغاز کیا، آقا کریم صلی اللہ علیہ وآلہ وسلم کی بارگاہِ بے کس پناہ میں ہدیہ عقیدت پیش کرنے کی سعادت عابد حسین مغل نے حاصل کی، علامہ غلام دستگیر منہاجین نقابت کے فرائض انجام دیئے۔ اس موقع پر عبدالقیوم نے پاکستان سے تشریف لائے علامہ وقاص خالد منہاجین اور محمد ناصر کیانی سیکرٹری پی اے ٹی ایبٹ آباد اور دیگر مہمانان گرامی قدر کو شرکت کرنے پر خوش آمدید کہا۔ حسب معمول اس موقع پر سالانہ درود پاک کی رپورٹ پیش کی گئی۔
تقریب سے اظہار خیال کرتے ہوئے عبدالقیوم نے درود شریف کی اہمیت افادیت اور اس سلسلہ میں منہاج القرآن کی انفرادیت پر روشنی ڈالی۔ دیرہ ٹیم سے آفتاب سبحانی اور جبل علی ٹیم سے نعیم احمد کو سال بھر میں سب سے زیادہ درود شریف پڑھنے پر ہدیہ تبریک اور تحائف سے نوازا گیا۔ اسی موقع پر بہترین حلقات درود ترتیب دینے پر دیرہ سے ساجد جاوید اور جبل علی سے محمد صفدر سلام و انعام کے حقدار ٹھہرے۔ حلقہ درود میں روزانہ، ہفتہ وار اور ماہانہ بنیادوں پر درود پاک کا نذرانہ جمع کرنے اور حساب رکھنے پر دیرہ سے محمد عابد حسین مغل جبکہ جبل علی سے محمد گلفام کو انعامات پیش کیے گئے۔ اس خوشی کے موقع پر سابقہ حسین روایت کو برقرار رکھتے ہوئے رفقاء اور ذمہ داران میں سے تین خوش نصیب ساتھیوں کو عمرے کے ٹکٹس سے نوازا گیا، جن میں سید غضنفر شاہ، علامہ غلام دستگیر اور نور مجدد شامل ہیں۔ مہمانِ خصوصی علامہ وقاص قادری نے خوش نصیب افراد کو خصوصی مبارکباد پیش کی۔
اس موقع پر تحریک بارے آگاہی اور ایونٹ کو حسین و مؤثر بنانے کے لیے سید شاہد حسین کاظمی نے تحریکی سوال و جواب اور تفریحی سرگرمیوں کی نشست منعقد کی، جس میں دوستوں نے بھرپور حصہ لیا اور کامیاب ہونے والے شرکاء میں تحائف تقسیم کئے گئے۔ بعد ازاں تحریکی نغموں اور انقلابی دوہڑوں سے محمد زرگام، محمد رضوان اور سمیر نعم نے محفل کا رنگ جمائے رکھا۔ آخر میں درود پاک کی سماعتوں میں سیدی شیخ الاسلام کی سالگرہ کا کیک کاٹا گیا اور وقاص خالد قادری نے آپ کی صحت و سلامتی اور مشن کی کامیابی و کامرانی کی دعا کروائی۔
پروگرام کا اختتام شرکاء کی خدمت میں پرتکلف کھانے سے ہوا۔
تبصرہ