منہاج القرآن انٹرنیشنل ڈنمارک کے زیراہتمام سٹار ایونٹ شادی ہال میں محفلِ میلاد النبی ﷺ کا انعقاد کیا گیا۔ محفلِ میلاد میں ڈنمارک میں پاکستانی سفیر اور ڈینش پارلیمنٹ کے ممبر سکندر صدیق سمیت مسلم کمیونٹی کے افراد نے بڑی تعداد میں شرکت کی۔
محفلِ میلاد کے پہلے سیشن میں منہاج سکول آف اسلامک سائنسز کے تینوں کیمپسز سے بچوں نے تلاوت، نعت اور تقاریر پیش کیں۔ نقابت کے فرائض علامہ عتیق احمد، علامہ ظہیر احمد اور علامہ ابرار ظفر نے ادا کیے۔
دوسرے سیشن کا آغاز قاری محمد ندیم اختر کی تلاوت سے ہوا۔ امیر تحریک ڈنمارک شیخ اشفاق احمد نے استقبالیہ کلمات پیش کیے۔ انگلینڈ سے سے آئے ہوئے نعت خواں حشمت خان نقشبندی اور شہباز حسن قادری نے اپنے مخصوص اور خوبصورت انداز میں بارگاہِ رسالتمآب ﷺ میں گلہائے عقیدت پیش کیے۔ محمد حمزہ یوسف نے سیرت النبی ﷺ کی اہمیت ڈینش زبان میں بیان کرتے ہوئے شیخ الاسلام کی کتاب ’نبی کریم ﷺ کی شخصیت کا خاکہ‘ پہ بات کی جس کا حال ہی میں ڈینش زبان میں ترجمہ کیا گیا ہے۔
حال ہی میں الازہر یونیورسٹی سے پی ایچ ڈی کی ڈگری مکمل کرنے والے منہاج القرآن ڈنمارک کے سکالر ڈاکٹر محمد ادریس الازہری نے اپنے مقالے کے اہم نکات پیش کیے۔ علامہ حافظ محمد سعید چشتی نے اردو زبان میں میلاد النبی ﷺ کی اہمیت پر خطاب کیا۔
اس موقع پر منہاج القرآن انٹرنیشنل ڈنمارک کے صدر ڈاکٹر عرفان ظہور احمد نے شرکاء کا شکریہ ادا کرتے ہوئے کہا کہ سولہ ضخیم جلدوں پر مشتمل اور بیس سال میں مکمل ہونے والی عربی زبان میں تفسیرِ قرآن کی تکمیل پر منہاج القرآن ڈنمارک شیخ الاسلام ڈاکٹر محمد طاہرالقادری کو مبارکباد پیش کرتی ہے اور یہ امر نہایت خوش آئند ہے کہ پانچ جلدوں پر مشتمل اس تفسیر کا نہ صرف ملخص تیار ہوچکا ہے بلکہ جلد ہی اس کے اردو اور انگریزی تراجم بھی تیار ہو جائیں گے۔
محفل کے اختتام پر میلاد النبی ﷺ کا کیک کاٹا گیا اور مہمانوں کو ضیافت میلاد پیش کی گئی اور دعا کے ساتھ محفل کا اختتام ہوا۔
تبصرہ